【香港人會一直向前邁進 勿讓過去嘅失敗成為絆腳石】
好多時我哋講起過往嘅抗爭，都會得出「抗爭失敗」嘅結論
2010年我哋阻止唔到高鐵撥款，2014年我哋爭取唔到真普選，2016年我哋嘅議員被DQ......
然而，如果唔單係將一場場抗爭運動割裂嚟睇，而係從歷史嘅角度嚟睇嘅話，我哋會發現其實香港人一直進步，本土意識覺醒，亦逐漸打破僵化嘅抗爭模式
雨革嘅失敗，令我哋明白咗大台模式、左膠、和理非教條主義、抗爭嘉年華化嘅禍害
立法會選舉嘅失敗，令我哋明白分裂、互相攻擊嘅後果以及制度內進行改革不可行
於是到2019年，我哋出現咗無大台模式、勇武抗爭、「不割蓆、不分化」精神、多元嘅網上/街頭行動......以至呢場抗爭堅持超過半年，大家仍然未放棄
以前車為鑑，以失敗嘅經驗提醒自己勿再重蹈覆轍，固然重要
然而我哋都要小心唔好矯枉過正，將新嘅理論變成另一種教條主義，或全盤否定以往嘅抗爭手法，而忽略探討某啲抗爭手法嘅可能性
例如：
以往泛民左膠常以「失民心」嚟道德綁架群眾，使勇武/不合作運動受掣肘；
然而「民意」係咪完全唔駛理？完全唔將「民意」納入考慮，會有乜嘢後果？
以往泛民左膠堅持和理非抗爭，未能動搖極權政府半分，甚至變得儀式化；
然而和理非抗爭係咪就等於左膠？儀式係咪一無是處？以往嘅問題係在於理念定係手法？
以往成日有散水撚以各種理由解散運動，但叫人養精蓄銳係咪就等於散水？
有啲概念好容易勾起我哋過往失敗經驗嘅記憶，從而產生負面印象，但我哋要小心分清楚出事嘅位喺邊，唔好太過一概而論
可能有啲人好善忘，可能有啲人行得好慢，但我相信香港人係前進中
我哋喺警醒嘅同時，都可以對同路人多啲信心，只要我哋唔放棄香港，不斷反思不斷精進，就唔會「輸」。
（附圖為自我鞭屍，當年我仲用緊粉筆喺地下畫黃傘，睇返都打冷震）
Search